Vil du jobbe hos oss?

Her finn du informasjon om oss og om rekrutteringsprosessen vår.

• Lær meir om oss 
• Rekrutteringsprosessen vår 
• Ny hos Statsforvaltaren i Møre og Romsdal 

Lær meir om oss!

Vi er om lag 150 tilsette som arbeider for ei trygg framtid for folk og natur. Vi har sterke fagmiljø, og samfunnsoppdraget vårt krev samfunnsforståing, kontinuerleg læring og tverrfagleg samarbeid. På kontorstaden vår i Molde, held vi hus saman med andre offentlege etatar.

Statsforvaltaren i Møre og Romsdal er ein arbeidsplass som famnar mange ulike fagfelt, kompetansar og kvalifikasjonar. Vi arbeider for å følgje opp Stortinget og regjeringa sine mål og retningsliner.

Arbeidsoppgåvene omfattar mellom anna tilsyn med kommunane sin økonomi og forvaltning, sosialfaglege og familierettslege saker, samfunnstryggleik og beredskap og oppgåver innan helse, utdanning, landbruk og miljøvern. Vi samordnar også anna statleg forvaltning i fylket og tar del i samarbeid og samhandling mellom stat, fylkeskommune og kommunar.

Les meir om organisasjonen vår: Organisasjonen | Statsforvaltaren i Møre og Romsdal (statsforvalteren.no)

Slik er den praktiske arbeidskvardagen vår

Vi jobbar tett saman i faggruppene våre, i eit miljø med opne dører, tillit og uformell tone. Hos oss blir du ein del av eit inkluderande fagmiljø der samarbeid, læring og deling står sterkt. Sosiale soner med minikjøkken, drikkeautomat og fruktfat gjer det lett å møtast gjennom dagen, og i lunsjen samlast vi gjerne i kantina – felles for heile embetet – der du kan treffe kollegaer frå ulike fagområde. Kantina tilbyr både varm og kald mat.

Vi legg til rette for at alle skal trivast, utvikle seg og meistre oppgåvene sine. Difor tilbyr vi ulike aktivitetar og møteplassar gjennom året, mellom anna velferdsarrangement og medarbeidardagar som byggjer både fagleg og sosialt fellesskap.

Vi har eit treningsrom som alle tilsette kan bruke, uavhengig av medlemskap i bedriftsidrettslaget. Du kan òg trene ein time i veka i arbeidstida, anten i treningsrommet eller ute.

Arbeidstida er frå klokka 08.00 til 15.30. Vi har fleksitid med kjernetid frå klokka 09.00 til 14.30, og opparbeidd fleksitid kan avspaserast. Dersom oppgåvene ligg til rette for det, kan du inngå avtale om heimekontor inntil to dagar i veka.

Som tilsett har du ei god pensjonsordning gjennom Statens pensjonskasse (SPK). Du betaler to prosent av brutto løn i obligatorisk premieinnskot, medan arbeidsgivar dekkjer sin del. I SPK får du òg tilgang til gunstige bustadlån.

Vi har i tillegg gode avtalar og fleksible ordningar for omsorgs- og velferdspermisjonar, både med og utan løn.

Rekrutteringsprosessen vår

Vi stiller store krav til oss sjølv i rekrutteringsprosessane våre. Vi vurderer kompetansen til søkarane opp i mot dei krava vi har til stillinga, og prosessane kring rekrutteringa er godt dokumenterte og etterprøvbare.

1. Vi kunngjer ledig stilling

Stillingane våre blir kunngjort på vår eiga nettside, på Ledige stillinger - arbeidsplassen.no (nav.no) og på jobbsida vår. I kunngjeringa informerer vi om oppgåver i stillinga, og om kva kvalifikasjonar vi vil at søkaren skal ha.

2. Vi behandlar søknadane

Etter søknadsfristen sjekkar vi om søkarane har kvalifikasjonane vi er ute etter. Vi leiter i søknad og CV. Derfor er det viktig at søknaden er komplett utfylt.

Vi ser også etter motivasjonen søkaren har for stillinga, relevant utdanning og erfaring.

Vi følgjer kvalifikasjonsprinsippet når vi vurderer søknadane. Det gjer vi for behandle alle søkarane likt. Om det er mange kvalifiserte søkarar, kallar vi inn dei vi finn best kvalifisert til intervju. Søkarar som ikkje fyller minimumskrava, blir ikkje vurdert som aktuelle vidare i prosessen.

Om du har søkt og ikkje blir kalla inn til intervju, kan det vere fordi konkurransen om stillinga er stor, eller fordi vi i denne runda ser etter andre kvalifikasjonar. Men: Kanskje har vi ei stilling for deg og din kompetanse seinare? Velkommen til å søke hos oss igjen!

3. Vi gjennomfører intervju og referansesjekk

Dei søkarane som best fyller kvalifikasjonskrava i kunngjeringa, kallar vi inn til intervju. Sjølve intervjuet gjennomfører vi enten digitalt, eller på kontoret vårt i Molde. I intervjuet møter du leiar for fagområdet, ein medarbeidar frå HR/personal og ein representant frå dei tilsette. I etterkant av intervjuet sjekkar vi referansar.

4. Vi tilsett

Leiar for den ledige stillinga, vil med bakgrunn i søknad, intervju og referansar lage ei innstilling som blir behandla i tilsettingsrådet vårt. I innstillinga blir kandidatane vurdert og rangert. Tilsettingsrådet vedtar tilsetting på bakgrunn av innstillinga.

Vi sender eit skriftleg tilbod til den som er innstilt først på lista for tilsetting. Om denne takkar ja til stillinga, vert det inngått ein arbeidsavtale.

Alle søkarar får informasjon om resultatet av tilsettingsprosessen.

Ny hos Statsforvaltaren i Møre og Romsdal

Når du har takka ja til stilling hos oss, tar vi kontakt for å få ein nærare avtale om oppstart, dag og klokkeslett.

Vi lagar ein plan for den første tida i jobben. Da får du mellom anna ein introduksjon til sentrale personar og støttefunksjonar. Du får tid til å bli kjent med oss og får gradvis meir og meir sjølvstendig ansvar for oppgåvene dine.

Samstundes som du setter deg inn i det faglege i den nye stillinga di, vil du også delta i opplæring om å vere tilsett i staten og hos Statsforvaltaren i Møre og Romsdal