Molde kommune må behandle plan for bustadfeltet Djupdalen Sør på nytt

Saka blir no sendt tilbake til kommunen for vidare behandling.  

Reguleringsplana Djupdalen Sør legg til rette for nye bustadtomter i Djupdalen like utanfor Molde sentrum. Planarbeidet starta første gongen opp i 2012, og er fremja av Djupdalen Panorama AS.

Utfordring med veg

Statsforvaltaren har behandla klager på reguleringsplana. 

- I  hovudsak handlar klagene om vegløysinga fram til det nye bustadfeltet i Djupdalen Sør. Reguleringsplana legg opp til bruk av den eksisterande og privateigde Djupdalsvegen. Eigarane av vegen har ikkje vore interessert i å gje frå seg nødvendige rettar slik at dei nye bustadtomtene i Djupdalen Sør kan bruke vegen, fortel Andreas Welle Rusten, fagleiar hos Statsforvaltaren i Møre og Romsdal.

Han seier Molde kommune har vedtatt reguleringsplana, men at dei ikkje har gjort ei tilstrekkeleg god avveging av interessekonflikten mellom vegeigarane og utbyggjaren.

- Ei slik vurdering er nødvendig for at grunnlaget og vurderinga bak planvedtaket skal kunne vere tilstrekkeleg, seier Welle Rusten.

Ikkje eit endeleg nei 

Statsforvaltarens rolle i slike klagesaker er avgrensa til enten å være einig i kommunens vedtak, og stadfeste det, eller å sende saka tilbake til kommunen for ny behandling.

- Vårt vedtak er difor ikkje eit endeleg «nei». Så lenge eit planvedtak ligg innanfor rammene plan- og bygningslova set, vil kommunen ha eit stort spelerom når det gjeld kva løysingar dei ser som best for utviklinga av området, seier Welle Rusten.