Retten til eit trygt og godt skulemiljø

Sei frå til rektor først

Viss du ikkje har det bra på skulen, må du eller foreldra dine melde frå til rektor om kva du opplever. Rektor skal ta det du opplever på alvor, og skulen må undersøka det som har skjedd. Undersøkinga skal gje skulen informasjon slik at dei kan setja inn tiltak for å hjelpa deg. Du har rett til å seia kva du meiner og kva du ønskjer at skulen skal gjera. Du kan seia meininga di sjølv eller la andre gjera det for deg. Dei vaksne på skulen skal hjelpa deg slik at du får det trygt og godt på skulen.

Skulen skal alltid laga ein skriftleg plan med tiltaka som viser korleis dei skal hjelpa deg. Du har rett til å seia kva du meiner om planen, og du har rett til å få planen frå skulen.

Sei frå til Statsforvaltaren viss skulen ikkje gjer nok

Rektor må kjenna til korleis du opplever skulemiljøet. Rektor har fem arbeidsdagar på å gjera deg trygg på at skulen skal hjelpa deg. Viss du etter dei fem arbeidsdagane ikkje er trygg på at skulen klarer å hjelpa deg, kan du melda frå til oss hos Statsforvaltaren i Rogaland. Det same gjeld viss du føler at skulen ikkje tek deg på alvor. Vi som jobbar hos Statsforvaltaren skal først finna ut om skulen har gjort jobben sin for at du skal få det trygt og godt på skulen. Dersom me ser at dei ikkje har gjort jobben sin, kan me bestemma kva skulen skal gjera for at du skal få ein trygg og god skulekvardag.

Er du elev eller føresett og ønskjer å melde frå om utrygt skulemiljø? Då ber vi deg ta kontakt ved å bruke anten raud eller oransje meldeknapp. Viss du brukar den oransje meldeknappen, må du logge inn med ein elektronisk identitet (eID). Med ein sikker eID er personleg informasjon trygg på nettet og det er vanskeleg for andre å late som at dei er deg i digitale tenester.