Kva er ei god mentorordning i veterinærtenesta?
Den Norske Veterinærforening (DNV) har etablert eit mentorprosjekt for å auke rekruttering av veterinærar til produksjonsdyrpraksis. No ynskjer dei innspel frå alle sektorar i landbruket for å utvikle ei god mentorordning.
Mentorordninga er eit pilotprosjekt finansiert av Landbruks- og matdepartementet (LMD). Formålet er å betre veterinærdekninga for produksjonsdyr og deltaking i vaktordninga.
Bakgrunn for mentorordning
Det er utfordringar med å rekruttere og behalde veterinærar til stordyrproduksjon, spesielt i distrikta. Ei gruppe sett ned av LMD har hatt ein grundig gjennomgang av tilgang på veterinærtenester i Noreg. Gruppa utarbeida ein rapport med liste over 21 tiltak til vurdering for å imøtekomma utfordringane. Lenke til rapporten er lagd ved i saka.
Mentorprosjektet vil ta for seg tre av desse tiltaka:
- Utvikle eit opplegg for ei mentorordning i distrikta
- Etablere eit system for ekstern utplassering under studietida
- Vurdere kurstilbod og - behov blant produksjonsdyrpraktikarar
Prosjektet skal bidra til å senke terskelen for veterinærar til å arbeide med produksjonsdyr, og gje "ferske" praktikarar ein mjuk start. Det er håp om at ein god start og eit godt fellesskap aukar trivselen og sannsyn for at veterinæren blir verande.
Korleis gje innspel?
Mentorprosjektet har ein eigen nettstad der ein kan gje innspel. Den finn du ved å følgje lenka her: Innspel til mentorordninga
Veterinærforeninga håpar på at du ynskjer å bruka portalen aktivt. Her er det lagt til rette for dialog mellom sektorar. Du kan skrive inn ditt eller dykkar innspel om kva ein mentorordning bør innebere, og kva utfordringar dykk har relatert til veterinærdekninga.
