Statsforvaltaren med ambisiøse miljømål for jordbruket i Trøndelag
- Meir areal enn i dag bør ligge upløgd gjennom vinteren og det bør vera gras i dalsøkk med stor erosjonsrisiko.
- Fleire kornåkrar enn i dag bør og ha grønt plantedekke om hausten og vinteren.
- Miljøtilskot for å gjennomføre tiltaka er «gulrota» for bøndene.
- For 2025 skal det betalast ut 145 millionar kroner for gode miljøtiltak i jordbruket i Trøndelag.
80 prosent av kornarealet bør ligge upløgd gjennom vinteren
Med våtare og meir varierande vintrar blir det ei stadig viktigare klimatilpassing å ikkje pløye om hausten. Omlag 60 prosent av kornareala våre er upløgd om hausten, noko som er ganske bra. Sidan haustpløyinga gjer at areala taper både jord og næringsstoff til vassdrag og sjø, er målet at 80 prosent av kornareala skal liggja upløgd og/eller ha grønt plantedekke om vinteren. Tilskotet for ikkje å pløye kornareal om hausten er mellom 75 og 315 kr per dekar, og varierer etter kor stor erosjonsrisiko areala har.
Alle kornbønder bør ha permanent gras i dalsøkka med størst erosjonsrisiko
I dalsøkk og sløgder i kornåkrar er det ofte stor fare for erosjon. For å hindre denne erosjonen er det svært effektivt å ha permanent gras. Vi har om lag 60 kilometer med slike grasdekte dalsøkk, «grasdekte vannveier». Målet vårt er at alle kornbønder skal ha grasdekke i det dalsøkket som har størst erosjonsrisiko. Tilskotet er 35 kr per lengdemeter når grasdekke er 6 meter breitt, dvs kr 5800 per dekar. Tilskotet er høgt sidan ein misser avling, får redusert produksjonstilskot og får heft i produksjonen.
Meir grønt plantedekke i kornåkrane om hausten og vinteren
Kornet avsluttar veksten tidleg om hausten. Dette gjer at kornareala ikkje heilt utnyttar potensiale for vekst. Ved å så vekstar saman med kornet, eller å så rett etter at kornet er hausta, kan ein få eit grønt plantedekke utover seinhausten. Dette plantedekke vil fange karbon, gje meir liv i jorda og redusere faren for erosjon. I dag har under ein prosent av kornareala våre ein slik sådd ettervekst (fangvekst), målet er at 20 prosent av kornareala skal ha dette. Som ein start bør alle kornbønder neste år prøva å så eit areal med fangvekst. Tilskotet for fangvekst i korn er 190 kr per dekar.
30 ulike ordningar
I Trøndelag har vi 30 ulike ordningar i regionale miljøtilskot, og bruker 145 millionar kroner ved søknadsomgangen 15. oktober. Vil du vite meir om ordningane ta kontakt med kommunen som forvaltar ordninga i det daglege, eller ta kontakt med Statsforvaltaren som utarbeider og har ansvaret for ordningane.
Lenke: Regionalt miljøtilskudd | Statsforvalteren i Trøndelag