Vi startar prosessen med å utvide Jotunheimen nasjonalpark

Involverte kommunar har gitt lokal aksept for å greie ut vern

Utviding av Jotunheimen nasjonalpark er ein del av oppdraget Bevaring av verdifull natur, gitt til statsforvaltarane av Klima- og miljødepartementet. Oppdraget om utviding av Jotunheimen omfattar i areal i både Innlandet og Vestland fylke. 

Nytt nasjonalparkvern skal, etter Stortingsmeldinga Natur for livet, basere seg på lokal aksept i den einskilde kommune. I perioden 2021-2024 gjennomførte Statsforvaltaren i Innlandet og Statsforvaltarane i Vestland ein sonderingsprosess i kommunane. Innan juni 2024 hadde fire av åtte kommunar rundt Jotunheimen gjort positive vedtak om å setje i gang utgreiing for utvida vern. Vi startar med dette opp verneprosess i kommunane Vågå, Øystre Slidre, Luster og Årdal.

Omfattande vern utløyser krav om konsekvensutgreiing

Når vi no set i gang både utviding av verneområdet til heilt nye område utanfor dagens Jotunheimen nasjonalpark, i tillegg til å endre status på delar av Utladalen frå landskapsvern til nasjonalpark, løyser det ut krav om konsekvensutgreiing. 

Statsforvaltaren i Innlandet og i Vestland har til no hatt litt ulik framdrift i prosessen, men frå hausten 2025 vil arbeidet vere samordna og skje parallelt i dei to fylka. I Innlandet er det allereie utarbeida fagrapportar for aktuelle tema. I Vestland vil dei utarbeide fagrapportar for stort sett dei samme tema som til dømes landbruk, reiseliv, geologi, og så bortetter. Sjå utgreiingsprogrammet for lista over tema. Disse fagrapportane vil i Vestland bli ferdige innan november 2025, og ligge til grunn for konsekvensutgreiinga vidare. 

Brei involvering og medverknad er avgjerande for ein vellukka verneprosess

Vi har etablert arbeidsgrupper i kvar kommune som er sett saman av representantar for ulike brukarinteresser. Disse vil kunne bidra med kunnskap om bruken av områda i dag og gje råd om utforming av vernereglar.

I tillegg til medverknad i arbeidsgruppene har vi lagt opp til brei medverknad elles i verneprosessen. Vi håpar alle som har kunnskap om området vil gje innspel til oppstartsmeldinga og til høyringa av verneplanframlegget, slik at saka kan bli så godt opplyst som mogeleg.

Framdrifta for verneprosessen er lagt opp slik i utgreiingsprogrammet:

• Levering av konsekvensutgreiing er planlagt til september 2026.
• Høyring av verneplanframlegget er planlagt fyrste halvdel av 2027.
• Vi kan forvente vernevedtak i beste fall løpet av 2027, eventuelt utover i 2028.

Du kan gje innspel til oppstartsmeldinga no! 

Utgreiingsprogrammet som ligg ved oppstartsmeldinga skildrar kva for tema vi skal få laga fagrapportar for og korleis du kan medverke i verneprosessen. Både oppstartsmeldinga og utgreiingsprogrammet ligg i ramma til høgre. 

Vi ønskjer velkomen innspel fram til 1. september 2025.