Verneplan for skog - Høyring

Statsforvaltaren sender med dette verneplan for frivillig vern av skog på privat grunn på høyring. Høyringa er ledd i det nasjonale arbeidet med frivillig vern av skog der private grunneigarar har sendt inn tilbod om vern av eigen skog. Tilboda i denne høyringa er sendt inn frå AT Skog.

Denne høyringa omfattar tre tilbodsområde i kommunane Notodden, Skien og Tokke. To av områda er nye naturreservat, eit er utviding av eksisterande naturreservat. Områda er lista opp med verneverdi i tabellen under:

Tiurkollen er kartlagt etter ny metodikk der verdiskalaen (score) går frå 0-9. Score omfattar summen av dei tre parametrane naturgitt mangfald, naturskogsnærleik og størrelse. Ein score på 4,5 betyr regional verneverdi. 

Føremålet med høyringa

Det er å få fram opplysningar om interesser som kan bli påverka av det planlagde verneforslaget. Vi ber høyringsinstansane om opplysningar om kulturminne, eldre gruver/gruveopningar, hytter, stølar, seterbuer, jaktbuer, stiar, sleper, traktorvegar og anna som bør vere kjend i områda. Spesielt ber ein grunneigarar som er kjend i det einskilde område om å melde i frå om slike ting. Elles gjer vi spesielt merksam på forslag til forskrift og føresegner. Grunneigarar som har bygningar innanfor verneforslaga må vurdere om dei ønskjer å take ut areal rundt bygningar, eller ha ein ryddesone rundt bygningane. Ryddesona utgjer normalt 2-4 daa. Ryddesona vert i så fall lagt inn i forskrifta med gnr./bnr. 

Høyringsfristen er 6. juni 2025

Det vil lette den vidare sakshandsaminga om det vert vist til saksnummer i fråsegner og at desse vert sendt oss elektronisk til vårt postmottak: sfvtpost@statsforvalteren.no

Spørsmål knytt til verneplanarbeidet kan rettast til Statsforvaltaren i Vestfold og Telemark, tlf. 33 37 10 00.