Tilskot til oppfølging av akuttmedisinforskrifta - forlenga frist

Vi oppmodar kommunar som har helsepersonell som ikkje oppfyller kompetansekrava i akuttmedisinforskrifta om å melde desse på kurs, og søke tilskot til refusjon for kursutgifter innan 31. oktober.

Les fullstendig utlysing og søk på nettsida til Helsedirektoratet. 

Ein kan få tilskot i år, sjølv om kursa blir gjennomført neste år, sidan ubrukte midlar kan overførast til 2022. Søknader blir behandla fortløpande så langt midlane rekk.

Kompetansekrav

Tilskotet er eit moglegheitsvindauge som blir lukka i haust, sidan Helsedirektoratet ikkje vil få tildelt noko budsjett til dette i 2022.  

Kompetansekrava i akuttmedisinforskrifta er utsett til 1. januar 2023. Tidlegare var fristen 1. mai. I denne artikkelen kan du lese meir om forlenging av overgangsordninga.

Kravet gjeld også helsepersonell på fastlegekontor som har legevaktansvar på dagtid. Helsedirektoratet har grunn til å tru at det er store udekka behov for opplæring, spesielt blant andre personellgrupper enn legar. Dette kan ein lese ut av låg registreing av slik kompetanse i helsepersonellregisteret, spesielt når det gjeld handtering av vald og overgrep.

Målet med ordninga

Målet for ordningen er at brukarane skal få betre kvalitet på legevakttenestene. Dette gjennom å auke kompetansen for legar og anne helsepersonell i legevakt gjennom kurs i akuttmedisin og valds- og overgrepshandtering og gjennom å auke grunnkompetansen for operatørar i legevaktsentralar.