Vil ha lik praksis i behandling av klager
Samanhengen mellom kommunane sine helse- og omsorgstenester og økonomi var tema i møte mellom leiinga i Statsforvaltaren i Møre og Romsdal, Statens helsetilsyn og i KS Møre og Romsdal.
Eit hovudtema var korleis Statsforvaltaren sine vedtak i klagesaker på helse- og omsorgstenester kan verke inn på kostnadsnivået i kommunane.
Det var Statsforvaltaren som inviterte til møte tidlegare i mai.
Praksis i klagebehandling ligg på landssnittet
KS viste til statistikk frå 2015–2022 som tydde på at Statsforvaltaren i Møre og Romsdal, oftare enn andre statsforvaltarar, sende klagesaker tilbake til kommunane. Statsforvaltaren la fram ferske tal frå 2023 til første tertial 2025 som viser at praksisen no ligg på landsgjennomsnittet.
– No opphevar, endrar eller stadfestar vi kommunale vedtak i same omfang som andre statsforvaltarar, seier assisterande statsforvaltar Rigmor Brøste.
Ønske om lik praksis
Statens helsetilsyn orienterte om at dei arbeider med å harmonisere saksbehandlinga til dei ti statsforvaltarane. Målet er å minske ugrunna forskjellar i praksisen. Helsetilsynet ønskjer òg å involvere Helsedirektoratet tettare i dette arbeidet.
– Sjølv om saksbehandlinga skal bli meir lik, skal den einskilde sitt behov alltid bli individuelt vurdert. Internasjonale konvensjonar som Noreg har slutta seg til, skal framleis skal vere utgangspunktet for vedtak om helse- og omsorgstenester, seier Brøste.
Krevjande økonomi og rekruttering i kommunane
Alle i møtet var samde om at kommunane står i ein krevjande situasjon både økonomisk og i å få rekruttert kvalifisert arbeidskraft.
– Etterspurnaden av helse- og omsorgstenester aukar. Dette er ein følgje av eit aukande tal av pasient- og brukarrettar som er vedtekne dei siste tiåra, og at det stadig blir fleire eldre i kommunane, seier Brøste.
Nytt møte til hausten
Det er avtalt eit nytt møte mellom KS lokalt og Statsforvaltaren i Møre og Romsdal til hausten.
– I mellomtida arbeider både kommunane og andre forvaltningsnivå nå mykje med omstilling. Statens Helsetilsyn sitt arbeid med å harmonisere saksbehandlinga av klager på helse- og omsorgstenester er eksempel på dette, seier Brøste.