Oppstart av verneprosess for austsida av Sandøya

Oppstart av vernearbeidet har bakgrunn i St.meld. 14 (2015-2016) Natur for livet, om bevaring av verdifull natur i Noreg. Arbeidet tar sikte på å dekke opp manglar ved eksisterande verneområde for trua landskap, naturtypar og artar. Tilsvarande verneprosessar skal skje i ei rekke område over heile landet.

Prosessen med vern vil vidare følgje saksbehandlingsreglane i naturmangfaldlova og forvaltningslova.

Naturreservat, som den mest aktuelle verneforma, kan opprettast etter naturmangfaldlova § 37 i område som:

a) inneheld trua, sjelden eller sårbar natur,

b) representerer ein bestemt type natur,

c) på annan måte har særleg betydning for biologisk mangfald,

d) utgjer ein spesiell geologisk førekomst, eller

e) har særskilt naturvitskapleg verdi.

Framtidige verneforskrifter vil vise verneområdet sitt formål, her under kva natur- og kulturverdiar vernet skal ivareta og den tilstanden ein ønskjer oppnådd med vernet, grensene til verneområdet, berørte eigedommar og bestemmelsar om bruk av området.

Pågåande aktivitet og bruk kan normalt fortsette og utviklast. Grunneigarar/rettshavarar vil behalde grunneigarretten til eigedommen. Generelt sett vil eit vernearbeid etter naturmangfaldlova ta sikte på å unngå vern av dyrka mark, private driftsbygningar, bustad- og hyttefelt og småbåthamna.

Vedlagte kart er særs grovt og inneber ingen vernegrenser, men derimot undersøkingsområde for vidare kartleggingar som skal gjerast.

Vi inviterer grunneigarar og andre interesserte på synfaring:

Fredag 27. juni kl. 10:10 – 12:15, med frammøte på kaia

Etter grundigare avklaring av verneverdiar og eventuelle brukskonfliktar, vil det bli avgjort om det skal utarbeidast framlegg til vernegrenser og verneforskrifter. Statsforvaltaren utarbeider så verneforslag med utkast til vernekategori, avgrensing og verneforskrift ut frå formålet med vernet.

Spørsmål til vernesaka kan rettast til Ola Betten, epost: ola.betten@statsforvalteren.no; eller Linda Aaram, epost: linda.aaram@statsforvalteren.no. Det ligg også informasjon på heimesida http://www.statsforvalteren.no/More-og-Romsdal.

Fråsegner og innspel til arbeidet kan sendast Statsforvaltaren i Møre og Romsdal, Postboks 2025, 6404 Molde, eller sfmrpost@statsforvalteren.no innan 15. august 2025.