Oppstart av verneplanprosess for skogvern i Molde

Områda er tilbydd av grunneigarane etter ordninga med frivillig vern.

Det er skogeigarforeininga Allskog som har formidla tilboda. Verneplanen gjeld utviding av eksisterande Sotnakken naturreservat og omfattar 5694 dekar.

Skogvern

Skogvernet skal bidra til å bevare eit representativt utval av norsk natur for kommande generasjonar og hindre at artar og naturtypar går tapt. Nær halvparten av dei truga artane i Noreg lever i skogen, og dei fleste er knytte til gammal, relativt upåverka skog og daud ved. Skogvern er derfor eit viktig og prioritert tiltak for å ta vare på naturmangfaldet og sikre leveområde for artar i norsk skog. Stortinget har vedteke eit mål om å verne 10 prosent av skogarealet i Noreg.

Føremål med vernet

Utvidinga av Sotnakken naturreservat omfattar gammal furuskog på eit område med gode vekstforhold (høg bonitet). Store delar av skogen vart stormfelt under ekstremvêret Amy. Område med mykje daudt trevirke frå gammal furu er lite representerte i eksisterande verneområde. Dei er svært viktige leveområde for sårbare artar som er avhengige av daud ved.

Det er ikkje venta at utvidinga vil ha negative effektar på skognæringa, verken lokalt eller regionalt. Det er ein føresetnad for vern at det vert inngått avtale om erstatning.

Slik gir du innspel

Innspel til verneplanarbeidet kan sendast Statsforvaltaren i Møre og Romsdal, postboks 2520, 6404 Molde, eventuelt på e-post til sfmrpost@statsforvalteren.no innan 10. september 2026.