Nye reglar for bruk av gjødsel

Det har i mange år vore arbeidd med eit nytt regelverk for lagring og bruk av gjødsel. Vi har hatt eit regelverk som omhandla gjødslingsplanlegging og eit anna regelverk som omhandla lagring, tilvirkning og bruk av husdyrgjødsel og anna organisk gjødsel. Det eldre regelverket er no erstatta av eit nytt, og den nye gjødselbrukforskrifta omhandlar lagring og bruk av all gjødsel. I tillegg er det komme ei ny gjødselvareforskrift som omhandlar produksjon, import og omsetning av organiske gjødselvarer og visse uorganiske gjødselvarer. 

Kva er nytt i gjødselbrukforskrifta?

Det er fleire ting som er nytt i det nye regelverket. Det eine er at gjødselbrukforskrifta omhandlar all gjødsel. Det andre er at det er lagt mykje meir vekt på fosfor enn før, som betyr strengare krav til spreieareal. Det tredje er at det blir endra spreietidspunkt. Det fjerde er at det blir krav om å føre journal over gjødslinga. I tillegg vil det bli visse forvaltningsmessige endringar. Fleire av krava har overgangsreglar, noko som betyr at det vil gå fleire år før alt er gjeldande. Det er også andre endringar enn dei som er nemnt nedanfor, men det gjeld relativt få av dei som driv vanleg jordbruksdrift. Viser til forskrift og rettleiar (sjå lenke) for meir utfyllande informasjon.

Fosforgrenser

Det vert fosforgrenser som avgjer kor mykje areal som trengst for å fordele gjødsla. Fosforgrensene (P/daa) vil gjelde for all gjødsel som er brukt på arealet. Dei første par åra er i praksis som før. 4 daa per gjødseldyreining tilsvarer om lag 3,5 kg P/daa. Dei strengaste grensene trår i kraft frå 2033. Dei aller fleste i vårt fylke vil ha nok spreieareal for husdyrgjødsla, når alt disponert areal er medrekna. Men mange har areal som ligg langt vekk frå fjøs og gjødsellager, og dei nye reglane vil innebere å måtte bruke alt arealet som spreieareal. Å måtte bruke areal langt vekk som spreieareal vil ha betydning for tidsbruk og kostnader.

Spreieareal

Spreieareal er all fulldyrka og overflatedyrka jord samt grøntanlegg og anlegg for dyrking av mat, fôr eller prydvekstar. Kommunen kan etter søknad godkjenne innmarksbeite som spreieareal, enten berre for mineralgjødsel eller for både mineral- og husdyrgjødsel. Det er ikkje tillatt å spreie gjødsel i naturlege vegetasjonssoner mot vassdrag, i ei sone på minst 2 meter (6 meter for innmarksbeite eller nydyrka areal).

Nye spreietidspunkt

Spreietidspunktet vil i vårt fylke vere frå 1. mars til 15. september, med krav til hausting eller etablering av plantevekst etter siste spreiing. Det er overgangsperiode i 2025 og 2026 med høve til spreiing frå 15. februar og fram til 15. september utan nedmolding eller 1. november med nedmolding, og utan krav til hausting eller etablering av plantevekst etter siste spreiing. I tillegg kan det vere ekstra to år overgangsperiode for enkelte føretak på visse vilkår (for liten lagerkapasitet då reglane trådte i kraft).

Gjødslingsplan, gjødslingsjournal og jordprøver

Det må førast journal over gjødslinga frå 2026 i tillegg til at kravet til gjødslingsplan i det alt vesentlege er vidareført. Det vert nokre nye krav til jordprøvetaking, m.a. krav til koordinatfesting og innrapportering.

Rettleiar og overgangsreglar

Landbruksdirektoratet har utarbeidd ein rettleiar med ei kortfatta oversikt over krava i gjødselbrukforskrifta. Den er retta mot næringa. Nedanfor er ei oversikt over dei mest aktuelle overgangsreglane i tabellform, med kun det som gjeld for Møre og Romsdal: