Selviktjønna har fått nytt liv
Selviktjønna på Harøya i Ålesund kommune har fått tilbake vatnet. Tidlegare var tjønna eit viktig våtmarksområde med rikt fugleliv, men etter grøfting på 1970-talet forsvann vatnet, og området grodde igjen. Dermed gjekk eit verdifullt våtmarksområde tapt.
Statsforvaltaren har, i samarbeid med grunneigarar, gjenoppretta tjønna, og den gamle bekken slyngar seg igjen gjennom landskapet.
Kvifor var dette viktig?
Tap av våtmarker truar mangfaldet i naturen. Slike område fungerer som naturlege reinseanlegg for vatn, regulerer flaum og gir livsrom til ei rekkje artar. Med restaureringa av Selviktjønna har vi gitt fuglar, amfibiar og vassinsekt eit trygt og stabilt miljø å leve i.
Våtmarker spelar òg ei viktig rolle i klimaregulering. Dei lagrar karbon, bidreg til å dempe effekten av klimaendringar og held på fukt for å hindre tørke i omkringliggande område.
Biletet syner Selviktjønna før restaurering. Grøfter går gjennom det tidlegare tjernet og har ført til drenering av vatnet. Foto: Øivind Leren.
Kva har vi oppnådd
- Sikra ein stabil vasspegel som landskapselement
- Fuglar har fått ein trygg stad for hekking og kvile
- Amfibiar og vassinsekt har fått eit nytt leveområde
Gjennom restaureringa har vi fått tilbake eit verdifullt naturområde, styrka det biologiske mangfaldet og sikra at Selviktjønna igjen kan vere ein viktig ressurs for både natur og menneske.
Biletet er tatt rett etter restaurering. Det er laga øyar som skal fungere som kvile- og hekkeområde for fugl. Foto: ACO anlegg.