Detaljregulering for Djupdalen Sør er endeleg stadfesta

Reguleringsplanen Djupdalen Sør legg til rette for 9 nye bustadtomter i Djupdalen, vest for Molde sentrum. Planarbeidet har vore langvarig, og starta første gongen opp tilbake i 2012. Arbeidet med planvedtaket som no har vore til klagehandsaming starta i 2016.

Tidlegare oppheva

Ved vår første klagebehandling av saka i januar 2023 oppheva vi kommunens planvedtak. Bakgrunnen var at kommunen ikkje hadde gjort ei tilstrekkeleg avveging av interessekonflikten mellom dei private vegeigarane i området og utbyggjaren av bustadfeltet. Seniorrådgivar hjå Statsforvaltaren, Therese Småland fortel at det i stort er dei same klagegrunnane som blei prøvd av oss i januar 2023 som vi har tatt stilling til på nytt.

- Klagarane meiner framleis at planens verknader på det eksisterande vegnettet i Djupdalen ikkje er tilstrekkeleg utgreidd. Klagarane har også peikt på løysinga for vatn og avløp ikkje er godt nok ivareteke.

Tilstrekkeleg utgreidd

Statsforvaltaren har no konkludert med at desse manglane er utbetra. Kommunen har mellom anna fått utarbeidd ei ytterlegare trafikkanalyse for området som konkluderer med at vegnettet er tilstrekkeleg dimensjonert for den auka trafikkmengda. Ulike løysingar for vatn- og avlaup er skissert, og kommunen skal godkjenne ein plan for korleis den endelege løysinga blir før utbygging tek til.

- Statsforvaltaren har konkludert med at kommunen har hatt eit tilstrekkeleg faktisk grunnlag for å vurdere saka ut frå, og at planvedtaket er sakleg grunngjeve ut frå eit reguleringsperspektiv. Kommunen vurderer at ulempene for naboane er av eit avgrensa omfang, medan fordelane med utbygginga er store. Vi konkluderer med at plansaka no er handsama i samsvar med lova sine krav og har av den grunn stadfesta reguleringsplanen, avsluttar Småland.