Storfebønder kan søkje om økonomisk støtte til tuberkulosetesting
Rogaland bondelag melder om at storfebønder som er bondelagsmedlem, og som må testa storfebesetningen i samband med Mattilsynet sitt overvakingsprogram for storfetuberkulose, kan få 3000 kroner i refusjon. Det skal dekka meirkostnaden bonden har hatt for ekstra personell til å gjennomføra testing.
Noreg har offisiell fristatus for storfetuberkulose. I 2022 til 2023 blei storfetuberkulose påvist i tre anlegg, og det nasjonale overvakingsprogrammet blei utvida med prøvetaking for å kartlegga førekomst av restsmitte hos storfe eller andre dyreartar. Det er viktig å oppretthalde fristatus for å sikra eksport av kjøt- og meieriprodukt, samt oppretthalde tillit til god dyrehelse og folkehelse.
Bonden sitt meirarbeid
Testinga starta etter beitesesongen i 2025 og vil føregå fram til mai 2026. Tuberkulintestinga av storfe kan bli aktuelt i fleire år framover. Om lag 150 anlegg skal testast i fyrste omgang, dei fleste er i Rogaland, Vestland og Agder. Alle dyr over 6 veker skal testast. Det krevst førebuing slik at testing kan skje med minst mogleg risiko for dyr og folk. Bøndene har difor hatt ekstra utgifter i samband med førebuing og gjennomføring.
Søknad om refusjon
Føremålet med ordninga er å betre HMS for personar som er med på testinga, sikra effektiv gjennomføring og redusera kostnaden for bonden. Ordninga er finansiert gjennom Bærekraftsfondet, og dekker utgifter til bruk av eigen avløysar, innleigd hjelp frå avløysarlaget eller anna praktisk bistand bonden har måtte skaffa. Ordninga gjeld for alle medlemmer av Bondelaget som har hatt ekstra personell i samband med testinga.
Ordninga har tilbakeverkande kraft, og gjeld frå overvakingsprogrammet starta høsten 2025. Bondelaget arbeider vidare med å få ein permanent og langsiktig løysing for handtering av ekstra ressursar i samband med testing av tuberkulose.
Skjema til refusjonssøknad sendast digitalt her.
Informasjon om utfylling av skjema