Hagl har gitt store skadar på epleavlingane
Fruktdyrkarane i Rogaland antar at opptil 80 prosent av epleavlingane er skada etter uveret den siste veka.
Dette innhaldet er meir enn eitt år gammalt. Informasjonen kan derfor vere utdatert.
Fruktdyrkarar frå 15 føretak var i går samla hos Atle Hauge i Hjelmeland for å diskutere situasjonen.
- Det ser ikkje oppløftande ut, og det kan bli lite norske eple utover i sesongen, seier Atle Hauge.
Eple får djupe sår i skalet av hagl, og dei har heller liten evne til å reparere seg sjølv. Eple som er skada kan gå til press og brukast til eplemost.
Hauge fortel at det er rapportert om skadar hos epledyrkarar i Randaberg, Finnøy, Forsand, Helgøy, Randøy og Hjelmeland, men at det er for tidleg å seie noko meir detaljert om omfanget. Det må dei kome tilbake til.
Rådgivarane frå Norsk landbruksrådgiving fortalde på møtet at det er tilsvarande skadar i fruktområda i Sogn, Hardanger og Lier.