Framleis midlar igjen i KMP for 2026!

Statsforvaltaren i Rogaland har fått 1 100 000 kroner frå Klima- og miljøprogrammet (KMP) til å støtte regionale prosjekt i 2026. I tillegg er det dratt inn midlar frå tidlegare ikkje-gjennomførte tiltak. Det er allereie innvilga tilskot til  tre prosjekt med ein samla tilskotsum på 413 000 kroner. Vi har 881 263 kroner igjen til nye tiltak. 

Regionale prioriteringar

Søknadar som støttar strategiar i regionale planar og i Regionalt miljøprogram kan få støtte. I 2026 ønskjer vi særleg å få inn søknadar på følgjande område:

• Fellestiltak som mobiliserer jordbruket til auka miljøinnsats for redusert tap av næringsstoff til sårbare vassdrag. Hålandsvatnet er særleg prioritert.
• Prosjekt som styrkar klimavenleg driftspraksis i jordbruket.
• Prosjekt innan følgjande tema:
  • Handtering av husdyrgjødsel. Til dømes digitalt kjøp og sal av husdyrgjødsel og hestegjødsel
  • Vipe
  • Kystlynghei; organisering til felles skjøtsel, osv.
  • Mobilisering for pollinatortiltak
  • Fangvekstar i ulike produksjonar
  • Bruk og effekt av biokol
  • Reinseteknikkar for vaskevatn frå landbruksbygg, til dømes fjørfe
  • Landbruksplast, handtering og mobilisering av innsamling osv.
  • Kartlegging av miljøkonsekvensar i samband med jordflytting/deponi
  • Auke i økologisk landbruksproduksjon

Søknadar innan anna tema relevant til klima- og miljøproblem­stillingar i landbruket er òg ynskjelege. 

Mål for midla

Måla for midlane er å bidra til:

• At produksjonen av mat skal skje med god ressursbruk og minst mogleg forureining, klimagassutslepp og tap av biomangfald.
• Å auke miljøtenestene frå landbruket som kulturlandskap, biologisk mangfald i kulturlandskapet, binding av karbon og produksjon av biogass.
• Å tilpasse agronomi og dyrkingssystem til endra klima, med sikte på å oppretthalde eller auke matproduksjonen og ta vare på ressursane.

Søkje tilskot

På Altinn.no finn du skjemaet "Klima- og miljøprogrammet (KMP) - tilskudd til fylkesvise tiltak". For å søkje prosjektmidlar må du logge inn med riktig rolle i Altinn, og fylle ut skjemaet. 

Vi behandlar søknadane fortløpande ut året, eller til potten er tom.

Alle som arbeider med kunnskapsutvikling eller -formidling kan søkje om tilskot, til dømes fag- eller næringsorganisasjonar, institusjonar som driv med utgreiing og forsking. 

Statsforvaltaren kan støtte inntil 75 prosent av den totale kostnadsramma for prosjektet.

Prissetting av eigeninnsats: Timesats blir rekna ut frå 1,2 promille av brutto årslønn, maks. 800 kroner per time. Vi viser til retningslinene for ordninga.

Statsforvaltaren kan i særlege tilfelle fråvike frå timesats og krav om eigenandel.