Denne veka kjem produksjonstilskotet
I følgje Landbruksdirektoratet skal produksjons- og avløysartilskotet for 2024 bli betalt ut 12. februar, men det vil truleg ta nokre dagar før alle får pengane på konto.
Dette innhaldet er meir enn eitt år gammalt. Informasjonen kan derfor vere utdatert.
I Rogaland har totalt 4003 føretak søkt om produksjons- og avløysartilskot for 2024. Det var 3995 føretak som fekk utbetalt tilskot for 2023. Då blei det betalt ut totalt 2 278 727 987 kr i produksjons- og avløysartilskot til rogalandsbøndene. Det er forventa at det blir betalt ut noko meir i tilskot for 2024, men summen er enno ikkje kjent. Tilskot som kjem inn under denne ordninga er blant anna tilskot til husdyr, driftstilskot til mjølkeproduksjon, areal- og kulturlandskapstilskot til planteproduksjon og tilskot til dyr på beite og utmarksbeite.
Tilskot ein del av inntekta til bonden
I følgje rapporten "Verdiskaping i landbruk og landbruksbasert verksemd i Rogaland" frå 2024, utgjer tilskot i gjennomsnitt rett over 20 % av dei totale inntektene hos bønder i Rogaland. Resten av inntektene kjem frå marknaden (basert på tal frå 2022, veksthus er ikkje tatt med). Gjennomsnittleg fordeling mellom marknadsinntekter og tilskot varierer mykje mellom kommunane i fylket.
Figur 1: Prosentvis fordeling av marknadsinntekster og tilskot for jordbruket i kommunane i Rogaland (tal frå 2022, veksthus ikkje tatt med). Kjelde: H. Knutsen og E. Gran m.fl., Verdiskaping i landbruket og landbruksbasert verksemd i Rogaland, NIBIO rapport vol. 10, nr. 123, 2024.
