Ei usikker framtid for vipa?
Jærkommunane Time, Klepp og Hå er saumfart for hekkande viper, den fyrste totalteljinga av sitt slag. Her finn ein truleg den største samlinga av hekkande viper i landet, - og Klepp er klart den viktigaste kommunen.
Dette innhaldet er meir enn eitt år gammalt. Informasjonen kan derfor vere utdatert.
Dette syner ein ny rapport av Kjell Mjølsnes om teljingar i tida 2011-2013 utarbeidd for Naturvernforbundet i Rogaland. Arbeidet er finansiert av Fylkesmannen i Rogaland.
 |
Teljingane har kartfesta dei viktigaste hekkeområda for fuglane, og ein har prøvd å estimera tal på fuglar som hekkar innanfor kommunane. Samla er det registrert 1954 par hekkande viper i dei tre kommunane, flest i Klepp.
To vipehannar i territorieflukt. |
Vipa har no forsvunne som hekkefugl frå stadig større deler av landet, men har framleis ein sterk posisjon på Jæren. Dette skuldast at Jæren er det beste hekkeområdet for arten i landet. Men eit studie over 15 år på Jæren utførd av Ingvar Byrkjedal m.fl. syner nær ein halvering i talet på hekkande viper i denne perioden. Dette stemmer bra med utsegn frå fleire bønder som rapporterar at den kjære fuglen forsvinn frå jordene.
Det er enno mykje viper på Jæren, truleg vipas siste skanse i Noreg. Dokumentert tilbakegang syner at arten vil kunne bli fåtallig også her over tid. Skal vipa være til stades i jordbrukslandskapet i framtida hastar det med tiltak. Viktige hekkeområde er no kartlagt, og ein kan bruka målretta verkemiddel for å ta vare på fuglane for framtida, i tett samarbeid med gardbrukarar og andre.