Melding om oppstart av verneprosess i 6 skogområde i Rogaland

Formålet med oppstartsmeldinga er å henta inn synspunkt på verneplanane og å sikra informasjon og medverking før det vert laga eit meir konkret verneforslag med detaljerte grensar og verneforskrifter med vernereglar.

Det meldast oppstart for 5 nye skogområde:

• Vetrhus, Sauda kommune, ca. 554 daa
• Ulladalen, Suldal kommune, ca. 1462 daa
• Dirdal aust, Gjesdal kommune, ca. 590 daa
• Dirdal vest, Gjesdal kommune, ca. 633 daa
• Baklåsjuvet i Suldal kommune, ca. 374 daa, eigd av 2 grunneigarar (dette er ein liten del av opphaveleg tilbodsareal).

Og utviding av eitt eksisterande verneområde:

• Rekedal naturreservat, Sokndal kommune, utviding på ca. 149 daa, totalt ca. 404 daa.

Aktuell verneform er naturreservat etter naturmangfaldlova § 37. Områda er tilbudd for vern av skogeigarane sjølve gjennom ordninga frivillig vern av skog. Her finn du meir informasjon om frivillig skogvern.

Kart som visar forslag til avgrensing av foreslåtte verneområde kan lastast ned frå høgre marg og kan også finnast på kart i Naturbase og Temakart Rogaland. Me gjer særleg merksam på at avgrensingane ikkje er endelege verneforslag, men er det arealet som skal greiast ut vidare i verneprosessen. Det må forventast endringar.

Formålet med vernet

Skogvern skal medverka til at ingen artar eller naturtypar vert utrydda og at eit representativt utval av norsk natur tas vare på for kommande generasjonar. Ei rekke trua naturtypar og halvparten av alle trua artar i Noreg er bunden til skog og skogsmiljø. Dei aller fleste av desse artane høyrer heime i den eldre urørte skogen, og fleire artar av insekt, sopp og fugl er avhengig av gammal skog og død ved. Mange høyrer også heime i skogtypane rik edellauvskog og boreonemoral regnskog. Gjennom vern får skogen stå urørt og utvikla seg fritt, og mange ulike livsmiljø vert sikra. Skogvern er difor eit viktig og prioritert tiltak for å ta vare på norsk naturmangfald. Stortinget har som mål å verna 10 % av skogarealet.

Naturfagleg grunnlag for vernet i det enkelte område kan også lastast ned frå marg. Dette er resultat frå naturfaglege kartleggingar. Rapportane frå skoganalyse er ein ny type rapport som vert laga etter kartlegging når område skal vurderast for vern. I denne storyen kan du lese om kva som inngår i analysane og korleis me vurderer om skogen er verneverdig. For alle områda føreligg ein skoganalyserapport, eventuelt også ein annan type rapport som dannar kunnskapsgrunnlaget. Ikkje alltid er heile det foreslåtte verneområdet kartlagt, då det av og til kjem meir tilbodsareal etter kartlegginga. Andre kunnskapskjelder er nasjonale og regionale databasar.

Ulladalen, Foto: Solbjørg Engen Torvik

Kva inneber eit vern?

Eit vern vil medføra at alle inngrep som forringar verneverdiane vil være forbodet og at all vegetasjon og dyreliv vil verte verna mot skade, øydelegging og forstyrring. Dette inneber forbod mot hogst, fysiske inngrep og motorferdsel. Tradisjonelt, enkelt friluftsliv, jakt, fiske og beite vil være tillate.

Innspel

No startar den formelle verneprosessen som følger naturmangfaldlova §§ 41-43, med kunngjering, grundige avklaringar av verneverdiar, verneformål og eventuelle følger/konfliktar vernet kan ha. Denne tidlege informasjon til aktuelle grunneigarar, organisasjonar som har særlege interesser i området og offentlege instansar, sikrar høve til tidleg tilbakemelding. På dette grunnlaget vil det utarbeidast framlegg til vernegrenser og verneforskrifter, med ny offentleg høyring.

Me er takksame for synspunkt på naturverdiar og brukarinteresser og anna, og ønsker innspel som kan bidra til gode løysningar for både bruk og vern. Me ønsker særleg innspel og forslag på namn på tre av områda. Eventuelle innspel, merknadar eller fråsegn kan sendast med brev eller e-post til Statsforvaltaren i Rogaland.

E-postadresse: (post@statsforvalteren.no).

Postadresse: Statsforvaltaren i Rogaland, Miljøvernavdelinga, Pb. 59, 4001 Stavanger

Oppstartsmeldinga vert også kunngjort i lokal presse.

Frist for uttale til oppstartsmeldinga er 10. oktober 2025.

Innspel må merkast med vår referanse 2025/11686 og namn på det enkelte verneforslaget.  

Rekedal, Foto: Solbjørg Engen Torvik