Totalforsvaret handlar om oss alle
Totalforsvaret er summen av dei sivile og militære ressursane i Noreg. Gjennom samarbeid mellom offentlege styresmakter, næringslivet, frivillige organisasjonar og Forsvaret skal totalforsvaret bidra til å førebyggje og handtere kriser, væpna konflikt og krig. Målet er å styrkje samfunnstryggleiken og sikre at viktige samfunnsfunksjonar kan haldast oppe når landet blir utsett for påkjenningar.
Statsforvaltaren si rolle
Statsforvaltaren har òg ei viktig rolle i den sivile delen av totalforsvaret. Oppgåva er å samordne beredskapsarbeidet i fylket, støtte kommunane og bidra til at offentlege aktørar samarbeider godt om førebygging, planlegging og handtering av kriser.
Statsforvaltaren følgjer opp kommunane sitt arbeid med samfunnstryggleik og beredskap, legg til rette for øvingar og erfaringsdeling og bidreg til samarbeid mellom kommunar, naudetatar, statlege etatar, Sivilforsvaret og Forsvaret. I kriser og krig skal Statsforvaltaren òg bidra til å halde oppe viktige samfunnsfunksjonar og koordinere sivil støtte til Forsvaret.
Totalforsvarsåret i Rogaland
Beredskap er eit kontinuerleg arbeid som krev langsiktig planlegging og samarbeid. Totalforsvarsåret gir høve til å rette ekstra merksemd mot korleis dei ulike aktørane i samfunnet kan styrkje den samla beredskapen.
I Rogaland vil Totalforsvarsåret prege aktivitetane gjennom heile året. Kommunane skal vidareutvikle evna si til å handtere kriser og krig, mellom anna gjennom øvingar og arbeid med planverk. Samstundes blir samarbeidet mellom kommunane, naudetatane, statlege etatar, Sivilforsvaret og Forsvaret styrkt gjennom felles aktivitetar og øvingar.
Statsforvaltaren deltek i fleire større øvingar og legg til rette for læring og erfaringsutveksling på tvers av sektorar. Målet er å styrkje samhandlinga mellom aktørane som har ansvar for samfunnstryggleik og beredskap.
Næringslivet som del av totalforsvaret
Næringslivet spelar ei viktig rolle i totalforsvaret. Mange verksemder leverer varer og tenester som er avgjerande for at samfunnet skal fungere også i krisesituasjonar.
For å styrkje kunnskapen om totalforsvaret og rolla til næringslivet blir det arrangert Totalberedskapskurs for toppleiarar. Kurset blir gjennomført i samarbeid mellom Statsforvaltaren, Sør-Vest politidistrikt, Forsvaret (HV-08) og Sivilforsvaret, og skal bidra til auka forståing for korleis offentlege og private aktørar kan samarbeide om samfunnstryggleik og beredskap.
Øvingar i Totalforsvarsåret 2026
Fleire nasjonale og nordiske øvingar er ein del av Totalforsvarsåret:
Cold Response (mars 2026)
Nordisk samarbeidsøving (mars 2026)
Noreg øver (andre halvår 2026)
Totalforsvarsøvinga TDX 26 (oktober 2026)
Valiant Duel (oktober 2026)
Noreg øver befolkninga under svekka eigenberedskap (oktober 2026)
Øvingane skal styrkje samarbeid, koordinering og evna til å handtere kriser på tvers av sektorar og nivå i samfunnet.
Eit ansvar for heile samfunnet
Totalforsvaret handlar ikkje berre om offentlege styresmakter og Forsvaret. Eit robust samfunn er avhengig av at også innbyggjarar, frivillige organisasjonar og verksemder er førebudde på å handtere uventa hendingar.
Eigenberedskap er eit viktig tiltak som gjer både hushald og verksemder betre rusta dersom viktige tenester blir sette ut av spel for ein periode. God beredskap og nasjonal motstandskraft byggjer på at alle tek ansvar og bidreg innanfor sitt eige område.
For meir informasjon om korleis du kan styrkje eigenberedskapen både heime og på arbeidsplassen, sjå DSB si rettleiing om eigenberedskap.