Utviding av Austefjorden og Blånuten naturreservat på høyring

Det tilbode område for frivillig skogvern omfattar eigedomane gnr/bnr: 11/2, 22/1-2, 22/3, 22/4, 22/5, 25/1, 29/1, 29/2, 29/6 og 35/2 i Kvinnherad kommune. Totalt er området på 3 467 dekar, derav 3 104 dekar skog og 2 634 dekar produktiv skog. Med utvidinga vil totalarealet for Austefjorden og Blånuten naturreservat kome på 10 653 dekar, og styrke også økologiske nettverk med nærliggande skogreservat.

Området utgjer relativt store areal med gamal og storvaksen furudominert skog. Her er godt innslag av litt kalkrike skog - og vegetasjonstypar, og stadvis stor treslagsvariasjon med betydeleg innslag av osp og edellauvtre. Det er stor topografisk variasjon, med førekomst av mange rikare myrar og bekkedrag som samla sett gjev stor habitatdiversitet. Vernet vil sikra samanhengande naturområde og styrka økologiske nettverk i eit av kjerneområda for skognatur i Vestland.

Frivillig vern av området inneber at skogeigarane tilbyr vern av eigen skog til staten. Det er eit nasjonalt miljømål at eit representativt utval av naturtypar og viktige artsførekomstar i skog blir verna for kommande generasjonar. Vern av skog er i tillegg viktig for å nå mange andre miljømål vedtekne av Stortinget. 

Les gjerne meir om verneverdiar, bruksinteresser, heimelsgrunnlag, med meir i høyringsdokumentet til høgre. Her har vi også kommentert innspel som har kome inn etter oppstartsmeldinga.