Vi spør bønder om konsekvensar ved nytt gjødselregelverk

Gjødellager
I Vestland er det mange føretak som treng større gjødsellager for å tilfredsstille nye krav. Foto: Øyvind Vatshelle/SFVL.

Nytt regelverk skal gje mindre forureining frå landbruket, men nye krav til spreieareal og tid for spreiing av husdyrgjødsel vil få store konsekvensar for mange som produserer mjølk og svinekjøt.

Publisert 03.04.2025

For å få oversikt og å kunna gje råd og støtte har Statsforvaltaren i Vestland gjennomført ei undersøking retta mot bønder som har mykje husdyrgjødsel. Svara viser at ein av tre har for lite gjødsellager, og at dei nye krava gjev utfordringar for mange.

Krav om lnok lagerplass

Det er krav om å ha lagerplass til den gjødsla som blir produsert gjennom åtte månader. I dag har mange klart seg med kortare tid, fordi dei har spreidd gjødsel om hausten. Det vert forbode å spreie etter 15. september og det vil også, frå 2027, kome krav om at ein må hauste avling etter siste gjødsling.  Desse endringane vil føre til behov for å utvide lagerkapasiteten.

Redusert fosforinnhald

Det nye regelverket set også grenser for kor mykje gjødsel som kan nyttast. I Vestland har det vore gjødsla med meir fosfor enn det plantene tek opp. Dette skal no reduserast over ein periode på åtte år. Det er nokså enkelt å redusere bruken av mineralgjødsel, men næringsstoffa i husdyrgjødsla kan det bli vanskelegare å finne plass til. Målet er å sikre godt utnytting av næringsstoffa og å avgrense tap til vassdrag og luft.

Vi har spurd bøndene om kva dei vil gjere for å unngå å gjødsle for sterkt med husdyrgjødsel. Blant dei som må gjere tiltak er det urovekkande mange som vurderer å redusere dyretalet. Andre tiltak er å fordele gjødsel på eit større areal, levere gjødsel til biogassanlegg eller levere gjødsel til andre. Å bruke kraftfôr med redusert mengd fosfor er også aktuelt.

Her kan du sjå svara:

Fann du det du leitte etter?

Ta gjerne kontakt med oss via sikker melding dersom du ønskjer at vi skal svare deg.