Rekordmange kommuneplanar på offentleg ettersyn i Vestland i år

Så langt i 2026, og til dels seint i 2025, har sju kommunar i Vestland lagt ut arealdelen til kommuneplanen på offentleg ettersyn. Dette gjeld Kinn, Alver, Stord, Osterøy, Eidfjord, Høyanger og Luster. I tillegg kan det liggje an til at ytterlegare inntil16 kommunar vil ha sin arealdel på høyring seinare i år. Dette gjeld Askøy, Aurland, Austevoll, Bergen, Bømlo, Fitjar, Gulen, Hyllestad, Kvinnherad, Modalen, Sogndal, Tysnes, Ullensvang, Ulvik, Øygarden og Årdal.

Arbeid med arealdelen til kommuneplanen er omfattande og komplekst så Statsforvaltaren vil likevel ha stor forståing for om nokre av kommunane treng ekstra tid for å førebu eit utkast.

Vi reknar likevel med at dei kommunane som har hatt planane på høyring i første halvår kan ha von om å gjere endeleg vedtak i kommunestyra i andre halvår i 2026.

Liv Signe Navarsete understrekar kor viktig ein oppdatert arealdel til kommuneplanen er for utvikling, vekst og vern i kommunane.  Navarsete er også oppteken av at kommunane i dialog med Statsforvaltaren og andre regionale instansar finn fram til gode løysingar som både varetar nasjonale og viktige regionale rammer, og som samstundes vektlegg lokalpolitiske val og ynskje om utvikling.

Statsforvaltaren er open for tidleg dialog om kommuneplanane, og gjennom eigne dialogmøte og drøftingar i høyringsfasen legg vi vekt på å bli samde slik at kommunane sjølve kan eigengodkjenne planane.