Roglandsbonden får produsera meir kumjølk i 2024

Gjennom ekstraordinære kvotedrøftingar for 2024 mellom Landbruks- og matdepartementet, Noregs Bondelag og Norsk Bonde- og Småbrukarlag, blei det vedteke å auke forholdstalet for disponibel mjølkekvote for kumjølk til 1,04. Det betyr at alle mjølkeprodusentar med disponibel kvote får produsera meir mjølk inneverande år.

Behov for meir kumjølk

Ifølgje referatet frå kvotedrøftingane er det meldt inn behov for meir mjølk frå uavhengige aktørar i mjølkemarknaden og Tine Industri. Tine, som er marknadsregulator, har berekna eit råstoffbehov på 1 439 millionar liter. Det gjev ein auke på 25 millionar liter kumjølk, samanlikna med det som blei lagt til grunn ved fastsetting av mjølkekvote i november 2023. I november blei forholdstalet disponibel mjølkekvote for kumjølk sett til 1,02. Volumet inkluderer import av mjølkepulver tilsvarande om lag 8 millionar liter mjølk.  

Tine presiserte at det er vanskeleg å prognosera tilførsel og etterspurnad, og det vil bli gjort ny vurdering av forholdstalet før sommaren. Dei andre organisasjonane tilrådde å auke forholdstalet av disponibel kvote til 1,05.

Gledeleg for Rogalandsbonden

Ifølgje statistikk frå Landbruksdirektoratet har roglandsbøndene ein disponibel kvote på nesten 289 millionar liter kumjølk for 2024 delt på 1015 produsentar. I 2023 var disponibel kvote 260 308 liter delt på 1035 produsentar. Det betyr at det er mogleg å auke mjølkeproduksjonen med om lag 19 millionar liter kumjølk i Rogaland. Dette er og positivt for å kunne auke lønsemda i mjølkeproduksjonen.

Referatet frå kvotedrøftingane kan du lesa her.

Tabellen under viser statistikk over disponibel kvote for kumjølk i 2023 og 2024 i Noreg. Tala er gitt av Landbruksdirektoratet.