Viktige endringar i integreringsregelverket frå 1. juli 2024

Redusert introduksjonsstønad for barnlause par

Ektefellar og sambuarar utan barn vil no få 5/6 av full introduksjonsstønad kvar, dersom begge deltek i introduksjonsprogrammet. Endringa gjeld for par som startar programmet 1. juli 2024 eller seinare, og påverkar ikkje einslege eller par med barn. Sambuarar blir definerte som personar som lever saman i eit ekteskapsliknande forhold, utan krav til varigheit. Endringa gjeld både for personar som blir omfatta av dei ordinære reglane og for dei som blir omfatta av dei mellombelse reglane i kapittel 6A.

Vidareføring og justeringar av mellombelse reglar

Kapittel 6A, som omfattar mellombelse reglar for personar med kollektivt vern, er forlenga til 1. juli 2026. Det er gjort enkelte justeringar i desse føresegnene.

Kapittel 5 om introduksjonsstønad gjeld også for dei med kollektivt vern

I integreringslova § 37 c er det gjort tydeleg at ordinære reglar om introduksjonsstønad også gjeld for personar under kapittel 6A, med mindre anna er spesifisert i dei mellombelse reglane. Sjølv om personar med kollektivt vern har "rett, men ikkje plikt" til å delta i introduksjonsprogrammet, må dei møte opp på planlagde aktivitetar dersom dei vel å delta. Fråvær utan løyve vil føre til trekk i stønad på vanleg måte.

Avslutning av introduksjonsprogram ved jobbtilbod

Deltakarar i introduksjonsprogrammet må avslutte programmet dersom dei får jobb eller tilbod om jobb på tilnærma heiltid (30-40 timar i veka). Kommunen skal krevje introduksjonsstønad tilbake ved feilaktige opplysningar. Deltakarar skal ha rett til å delta i introduksjonsprogram etter at arbeidsforholdet har opphøyrt, føresett at dei har budd i busetjingskommunen i mindre enn to år.

Avslag på introduksjonsprogram for dei med jobb

Kommunen kan avslå deltaking i introduksjonsprogram for personar som har full jobb eller tilbod om slik jobb. Personen kan likevel delta i programmet dersom arbeidsforholdet stansar, under visse vilkår.

Endringar i andre regelverk

Det er gjort endringar i andre lover som påverkar integreringsfeltet. Mellom anna er det innført eit unntak i yrkestransportlova for å la fordrivne frå Ukraina raskare kunne bli bussjåførar. Endringar i barnetrygdlova gjer at fordrivne ikkje lenger får etterbetalt barnetrygd for det første året i Noreg, og tannhelsetenestelova har no krav om fem års butid for unge vaksne (19-24 år) for å få rabattert tannhelseteneste.

Du finn meir om endringane på IMDi sine heimesider. I blokka til høgre finn du lenke til desse.

Du kan også lese meir om endringane i forarbeidene. I blokka til høgre finn du lenker til desse.