Framande planter

Framande artar er artar som finst utanfor sin naturlege veksestad. Planteimport er ei av hovudkjeldene til spreiing av framande planteartar. Fleire planteartar har stort invasjonspotensiale og er vurdert å ha svært høg økologisk risiko. 

Statsforvaltaren jobbar med nedkjemping og tiltak mot dei framande planteartane i Møre og Romsdal. I 2024 har vi prioritert kjempebjørnekjeks, rynkerose og nokre område med kjempespringfrø.

Til venstre: Kjempebjørnekjeks. Øvst: Rynkerose. Nedst: Kjempespringfrø.

Artar som parkslirekne, hagelupinar og legepestrot m.fl. har vi dessverre ikkje midlar til å fjerne utanfor naturreservata. Her er vi avhengige av at andre trør til!

Til venstre: Hagelupin. Øvst: Parkslirekne. Nedst: Legepestrot.

Metodane vi brukar er luking, nedkapping, utspading av røter eller behandling med plantevernmiddel. Dei ulike artane reagerer ulikt på forskjellig behandling alt etter om dei er eitt-årige eller fleirårige, korleis rotsystemet er, og om dei formerer seg med frø eller vegetativt. Feil tiltak kan gjere meir skade enn nytte.

For å vite kor og korleis ein skal nedkjempe framande artar, er det viktig å ha god oversikt over spreiinga. Du kan som privatperson være med å auke kunnskapen om utbreiinga av dei framande artane. Lær deg korleis dei ser ut, og registrer dei gjerne i Artsobservasjoner.

Kva kan du gjere i kampen mot framande planteartar:

• Ikkje plant forbodne plantar på eigedommen din.
• Fjern framande artar frå eigedommen din, men gjer det på rett måte.
• Ikkje dumpe hageavfall i naturen. Framande artar skal leverast til godkjent avfallsanlegg.
• Lær deg korleis framande artar ser ut, og rapporter gjerne funn i Artsobservasjoner.
• Meld frå om funn av kjempebjørnekjeks, rynkerose og kjempespringfrø på heilt nye stader til Statsforvaltaren.
• Snakk med andre om at framande artar bør fjernast og er ein trussel for naturen og det biologiske mangfaldet.

Meir informasjon om tiltak mot framande artar finn du her:

Innhente kunnskap om fremmedarten - miljodirektoratet.no