Inngrep i vassdrag

Inngrep i vassdrag er eit samleomgrep for tekniske tiltak og vassuttak til andre føremål enn vasskraftutbygging. Alle tiltak i vassdrag krev løyve frå anten Norges vassdrags- og energidirektorat (NVE) eller Fylkesmannen/fylkeskommunen, i tillegg til kommunen si handsaming etter plan- og bygningslova.

Fylkesmannen si oppgåve

Fylkesmannen gjev råd til kommunane og NVE i deira handsaming av saker om tiltak i vassdrag. For tiltak på lakse- og sjøaureførande strekningar, skal vi òg handsame sakene etter forskrift om fysiske tiltak i vassdrag. Fylkeskommunen handsamar søknadar etter same forskrift i vassdrag/deler av vassdrag utan laks og sjøaure.

Fordeling av inngrepssaker som Fylkesmannen har jobba med i 2019:

Svaret frå Fylkesmannen er ofte at tiltaket kan gjennomførast, men med krav om nokre miljøtilpassingar. Vi gav 19 løyve, og 21 positive tilrådingar til kommunar og NVE i 2019. I fem saker rådde vi frå tiltaket, eller avviste søknaden på grunn av mangelfullt kunnskapsgrunnlag.

Graving og fisk

Graving i og langs vassdrag kan skade laks og sjøaure både i området gravinga skjer, og nedstraums gravinga. Det er særskilt rogn og yngel som kan bli negativt påverka av graveaktivitet. Finstoff frå gravinga, som sand og silt, kan tette att hulromma i gytegroper der rogn og yngel ligg. Dette kan føre til auka dødelegheit. For å unngå dette bør graving og andre tiltak i vassdrag difor berre skje i perioden det ikkje ligg rogn og plomsekkyngel i grusen, dvs. i juli – september.

Kantvegetajon

Vi understrekar at det er knytt eit lovfesta krav i vassressurslova § 11 om ein funksjonell kantvegetasjon langs vassdrag. Det er ikkje lov å fjerne kantvegetasjon langs vassdrag utan løyve frå Fylkesmannen.