Fritak frå kravet
Statsforvaltaren kan i særlege tilfelle gi løyve til å fjerne kantvegetasjon. Som regel gjeld dette mellombels fjerning, og det blir sett krav om at kantvegetasjonen skal etablerast på nytt etter at tiltaket er gjennomført.
Aktuelle tiltak du kan søkje om løyve til, er:
- hogst for å sikre trafikksikkerheit og god sikt
- hogst i samband med erosjonssikring eller flaumvollar langs vassdrag
- hogst for å betre tilstanden til kantvegetasjonen, som fjerning av framande treslag eller tette granbestand
- hogst som er nødvendig for normal drift av jordbruksareal
Sjå kontaktinformasjon nedst på denne sida, for å sende oss ein søknad på e-post.
Kommunen kan søke om løyve til tiltak i vassdrag: Fysiske tiltak i vassdrag
Ansvarlege partar
Grunneigaren er ansvarleg for å halde ved lag kantvegetasjonen. Statsforvaltaren kan gi pålegg om retting, tvangsmulkt, overtredingsgebyr og stans av ulovleg verksemd.
Noregs vassdrags- og energidirektorat (NVE) kan vedta fysiske tiltak.
Viktig for folk og natur
Kantvegetasjonen langs vassdrag har stor verdi og mange viktige funksjonar for både natur og folk, men er under press mange stader.
Vassressurslova set krav om at det skal oppretthaldast naturleg kantvegetasjon langs alle vassdrag med årssikker vassføring.
Noregs vassdrags- og energidirektorat (NVE) har ein rettleiar om kva tiltak som kan gjerast utan å bryte reglane om kantvegetasjon.