Tilskotsordning tungdrevne driftsformar
Gjennom UKL-satsinga i Ullensvang er det i år sett i gang fleire prosjekt for å ta vare på og vidareutvikla verdiane. Arbeidsgruppa for UKL-Ullensvang har vore med på å meisle fram ei tilskotsordning som skal ta vare på breidden og tidspennet i fruktproduksjonen i Hardanger. I dag vert stadig fleire areal planta til med frukt i tettplantingssystem som ein finn i store delar av Europa. Fruktareal som tidlegare vart drifta på små teigar og utan traktorvegar bidreg til å oppretthalda særpreget i fruktlandskapet. No er dei i ferd med å forsvinne.
Arbeidet har vore retta mot å kartleggja representative bruk og vurdera arbeidsinnsats, kostnader og driftsutfordringar knytt til slike små fruktteigar. Dei er ofte bratte og tungdrevne terrassar med eldre dyrkingssystem. I haust blir det lyst ut ei prøveordning som skal stimulera til vidare drift av areal med stor landskapsverdi og som held ved like dei ulike driftsformene i fruktdyrkinga.
Eit gjennomgåande mål har vore å utvikla ei ordning som utfyller eksisterande kulturlandskapsordningar som RMP og SMIL. Ein har difor vald å utvide ordninga til å kunne ta vare på enkelte gamle frukttre, gjerne med historiske sortar, som gir stor kulturhistoriske verdi i fruktlandskapet og tuna på fruktgardane i Hardanger.
Pollinatorar, biologisk mangfald og mosaikklandskap
Neste år skal UKL-Ullensvang utvikla eit delprosjekt som styrkjer pollinerande insekt og biologisk mangfald i fruktlandskapet. Det vil bli lagt særleg vekt på korleis mosaikk, landskapsvariasjon og ulike arealbrukstypar påverkar pollinering og artsmangfald.
Arbeidet skal bygge på forskningsprosjekt og kunnskapsbanken til NIBIO, NLR og andre fagmiljø. Delprosjektet skal munne ut i ein praktisk rettleiar for fruktdyrkarane og formidlast gjennom markvandringar, innslag på fagmøte og pilotprosjekt der tiltak kan prøvast ut i felt. Målet er å byggje opp under ei framtidig tilskotsordning for pollinatorvenlege tiltak som kan ta vare på og byggje eit variert og artsrikt fruktlandskap.
Refotografering og skuleformidling
Refotografering av fruktlandskapet i Hardanger er eit viktig grep både for å dokumentere historia og å lage eit biletarkiv som seier noko om startpunktet for UKL- Ullensvang.
Nytt i år er at lokale skular har vore involverte i refotograferingsprosjektet, eit arbeid som vil bli vidareført basert på NIBIO sitt nye undervisningsopplegg for refotografering. Undervisningsopplegget kombinerer dokumentasjon av kulturlandskapet med formidling og læring gjennom aktiv involvering av skular og lokalsamfunn.
I 2026 har ein starta opp arbeidet med å samle inn historiske fotografi, skanning av fotoarkiv og finne punkt i landskapet for framtidige refotograferingar. Arbeidet vil skje i samarbeid med tilsette på museum med planlagte fotoverkstader, som involverer lokalbefolkninga i september og utover vinteren. Prosjektet dokumentera endringar i fruktlandskapet over tid, og kor mykje ein klarer å ta vare på tidsdjupnaet i landskapet.
Formidling, forteljingar og besøksopplevingar i fruktlandskapet
På sikt skal UKL-Ullensvang utvikla ei heilskapleg plan for formidling av fruktlandskapet i Ullensvang gjennom kombinasjon av digitale løysingar, historieforteljing, skilting og besøksopplevingar. Ein vil gjere fruktlandskapet meir tilgjengeleg og forståeleg for både innbyggjarar og besøkjande, samstundes som prosjektet styrkjer lokal identitet, stoltheit og kunnskap om fruktlandskapet sine særeigne verdiar. Difor vil ein spesielt arbeide med språk og lokale uttrykk for å formidle historia til fruktdyrkinga og dei særmerkte kvalitetane ved fruktlandskapet.
Formidlingsarbeidet vil starte opp i løpet av 2027, då ein ynskjer eit tett samarbeid med reiselivsaktørane og besøksforvaltningsprosjekta i kommunen, som er i ferd med å lage strategiar på desse områda i Hardanger. Turismen er aukande og det er viktig at ein treff ulike målgrupper godt med integrert informasjon om UKL-Ullensvang i skilting og informasjon i Sørfjorden i Hardanger.