Jordbruk

• Nasjonal strategi for økologisk jordbruk (regjeringa.no)
• Økologisk landbruk (landbruksdirektoratet.no)
• Norsøk.no

​

Tidsrom for spreiing av gjødsel i Vestland er mellom 1. mars og 15. september, og gjeld all gjødselvare. Silopressaft har også frist 15. september. Det er framleis forbode å spreie gjødsel på frosen eller snødekt mark. Mange må no planlegge meir spreiing av husdyrgjødsel på vår og forsommar, for å unngå gjødsel som må ut etter siste slått. Kommunen kan ikkje lenger tillate gjødselspreiing etter fristen. Statsforvaltaren får høve til å gi dispensasjon, men berre i særskilte tilfelle.

Sjå eige søknadsskjema om dispensasjon frå spreiefrist her. 

2026 er siste året med høve til å spreie med nedmolding fram til 1. november. Som eit alternativ til dette vil vi heller oppfordre til å søke dispensasjon for å kunne overflatespreie også etter 15. september. 

Dei som har for lite lager har ein overgangsordning ut 2028 med høve til å spreie med nedmolding fram til 1. november. Dette gjeld berre dersom det ikkje er vesentlege endringar i drifta, til dømes omlegging til lausdrift eller installering av mjølkerobot. 

All bruk av gjødsel på innmarksbeite krev godkjenning frå kommunen. Dei som har dokumentasjon med tidlegare godkjenningar for spreiing av husdyrgjødsel slepp normalt ny godkjenning. Ta kontakt med din kommune for meir informasjon om godkjenning av innmarksbeite som spreieareal. 

Mineralgjødsel kan som ei overgangsordning bli spreidd på innmarksbeite utan godkjenning i 2026 og 2027 dersom gjødslingsplan for 2022 eller 2023 viser bruk av mineralgjødsel på det aktuelle beitet. I andre tilfelle må kommunen godkjenne innmarksbeitet som spreieareal før bruk av mineralgjødsel.

Det er krav om minst to meter gjødslingsfri sone mot vassdrag, som tidlegare har vore vanleg praksis. For innmarksbeite er denne sona utvida til minimum seks meter.

Gjødsling med fosfor blir no kraftig innskjerpa. Frå 2027 er maksimal mengde fosfor 2,8 kg per dekar og 2 kg per dekar for innmarksbeite. Dette er summen av fosfor frå mineralgjødsel, husdyrgjødsel og andre gjødselslag. Kravet vert vidare vesentleg innskjerpa med gradvis nedtrapping frå 2030 og 2033. Dette betyr at du som bonde må spreie husdyrgjødsla over eit større areal og bruke mineralgjødsel utan fosfor.

For 10 mjølkekyr på innefôring eller beite på innmark trong ein tidlegare å spreie husdyrgjødsla på 40 dekar spreieareal. Frå 2025 trengst 43 dekar spreieareal for dei same dyra, frå 2027 trengst 54 daa, med opptrapping til 65 dekar i 2033. Dersom ein har behov for å bruke mineralgjødsel med fosfor, trengst større areal.

Alle som disponerer og gjødslar meir enn 25 daa per år, skal ha gjødslingsplan. Dyrkar du potet eller grønsaker som blir gjødsla med meir fosfor enn dei generelle grensene, må du ha gjødslingsplan om arealet er større enn 5 dekar.

Planen skal vere klar før vekstsesongen tek til. 

Det er mogeleg å søkje om dispensasjon frå kravet om gjødslingsplan, men det blir berre gitt ved særlege høve. Ekstensiv drift er åleine ikkje grunnlag for dispensasjon. Søknaden skal sendast i eige søknadsskjema til Statsforvaltaren i Vestland med kopi til kommunen. 

Ønskjer du lese meir om krav til gjødslingsplan finn du informasjon på landbruksdirektoratet sin rettleiing til gjødselbrukforskrifta.  

Alle som bruker gjødselvare, skal føre gjødseljournal. Den skal kunne leggjast fram for kontroll seinast 1. november det året gjødslinga er gjennomført. Gjødseljournalen skal vise: 

1. kor og når det er gjødsla
2. kva for type og mengde gjødsel som er brukt
3. kor mykje fosfor og nitrogen som er tilført kvart areal
4. kor mykje total-nitrogen og total-fosfor som er påført

Ønskjer du lese meir om gjødseljournal finn du informasjon her, på landbruksdirektoratet sin rettleiing til gjødselbrukforskrifta.  

Utandørs husdyrhald må drivast slik at ein unngår opphoping av gjødsel og fare for forureining. Konkret kan ikkje fôringsplassar ligge på same stad over lang tid, og dei må også plasserast i god avstand frå vassførekomstar og dreneringssystem. For permanent utandørs luftegard, fôringsplass, liggeplass, drikkeplass mv. er det no krav om å samle opp gjødsla og fjerne den minst ein gong i vekstsesongen og ein gong om hausten.

Alt areal som blir gjødsla skal haustast. Frå 2027 er det også krav om hausting ved slått eller beiting etter spreiing av husdyrgjødsel om hausten. Ved kontroll på om føretaket har nok spreieareal er det berre det arealet som faktisk er gjødsla med husdyrgjødsel som tel med.

Silopressaft kan spreiast fram til og med 15. september, utan at det er krav om å hauste ved beiting eller slått eller å etablere ein plantevekst. 

Det er berre Statsforvaltaren som kan gje dispensasjon frå den nye forskrifta. Statsforvaltaren kan også setje strengare krav til lagring og bruk av gjødsel der vassmiljømåla ikkje er nådd. Det er høve til å søke Statsforvaltaren om å nytte balansegjødsling for fosfor, eller ekstra husdyrgjødsel i fosforfattig jord. Kommunen kan gje løyve til bruk av husdyrgjødsel på anna areal for å opparbeide nytt beite.

Manglande eller mangelfull gjødslingsplan eller ulovleg spreiing av gjødsel har tidlegare vore straffa med trekk i tilskot. Trekk i tilskot er framleis aktuelt, men no grunna brot på anna regelverk enn produksjonstilskotsregelverket.

Ved brot på reglane kan kommunen eller Mattilsynet følge opp saka etter forureiningslova, matlova eller folkehelselova. Dei kan mellom anna gi pålegg om utbetring og ilegge tvangsmulkt dersom krava ikkje blir følgt opp. Du kan og bli pålagt å gjere nærare undersøkingar eller gje opplysningar i saka. 

Alvorlege brot på regelverket kan bli melde til politiet og straffa etter dei tre lovene. 

Vedtak som er fatta av kommunen kan du klage på til Statsforvaltaren. Vedtak fatta av Mattilsynet kan du klage på til Mattilsynet. Vedtak fatta av Statsforvaltaren kan du klage på til Landbruksdirektoratet. Klagen skal sendast til det organet som har fatta vedtaket.

Kontakt kommunen ved spørsmål om regelverket. Du finn også mykje god informasjon på landbruksdirektoratet si heimeside.